حجاجوفيتش: 15 سبب لتدهور الاقتصاد فى مصر ويتساءل: مصر رايحة على فين؟

تحدث الرحالة المصري أحمد حجاجوفيتش عن أسباب عدم تحسن الاقتصاد المصري وهروب “أو ابعاد” المستثمرين من مصر.

-

-


وقال في تدوينة له عبر صفحته الرسمية على موقع التواصل الاجتماعي “فيسبوك”: “15 سببا ليه الاقتصاد المصري مش بيتحسن وبيبعد كل المستثمرين عن مصر، وفيما يلى الأسباب التى ذكرها من وجهة نظره:

1. حل مشكلتنا بغض النظر عن كل الكلام اللي فات إننا نثبت سعر الدولار على أي سعر (السعر العادل)، زي ما السعودية على سبيل المثال مثبتة سعر الدولار على (١ دولار= ٣،٧٥ ريال) من سنة ١٩٨٦ يعني السعودية مثبتاه أكتر من ٣١ سنة واحنا مش عارفين نثبته للأسف أكتر من ٣ أيام.

2. لو فعلاً الحكومة عاوزة تحل مشكلة الأسعار حتى لو حل مؤقت، كل الشركات تنزل أسعار منتجاتها على أكياس أو علب منتجاتهم، وده حيجبر التجار علي بيع الحاجة بسعر موحد.

3. الدولار ولا انهار ولا حاجة زي ما بعض الأخبار بتقول، الدولار كان سعره ٨ جنيه زي دلوقتي السنة اللي فاتت.

4. لو تاجر استورد حاجة من شهر ونص لما كان الدولار بـ ٢٠ مش حيبيعها بسعر النهاردة ١٦ جنيه.

5. طول ما انت مش عارف تشتري دولار من البنك زي زمان والبنوك بتشتري بس مش بتبيع اعرف إن ده مش السعر العادل للدولار.

6. الفترة اللي فاتت كل حاجة غليت الضعف والـ ٣ أضعاف على الأقل ومفيش حاجة في مصر بترخص بداية من العربيات المستوردة للزيت والسكر والفول اللي برضه بنستورده لغاية البامبرز.

7. طول ما السياحة واقفة ومفيش أي مصنع بيفتح، وكل حاجة بنستوردها ومفيش حاجة بنصدرها وإنك متقدرش تشتري دولار من البنك حتفضل المشكلة زي ما هي وأي كلام عن تحسن الاقتصاد هو ضحك على العقول.

8. مفيش بلد في العالم سعر العملة بتاعتها كل يوم بسعر مختلف وده اللي بيخلي مفيش مستثمر أو تاجر حيستورد بضاعة في بلد كل يوم الدولار بسعر وده الكلام اللي قالوه رجال الأعمال والمستثمرين لحجاجوفيتش برة.

9. الدولار برضه ولا حيوصل ٤٠ جنيه ولا حاجة رغم إن بعض الناس مش عارف بتفكر إزاي بتتمنى ده ومش عارفين إن الشعب اللي هو أنا وانت هو اللي بيتبهدل في أي جنيه سعر الدولار بيزيده.

10. عمرك ما حتعرف تعمل رقابة على الأسعار لأن التاجر اللي بيستورد بشكل يومي حياخد أرباحه بأكتر سعر دولار استورد بيه وعمر الجهات الرقابية ما حتعرف تحدد السعر.

11. برضه كلنا خسرانين لما سعر الدولار يقل لأن ده بيخلي أسعار السلع عالية والمواطن مش حيحس بأي فرق والتاجر هو الوحيد المستفيد والمواطن هو برضه اللي حيظل مطحون لأن زي ما قلنا مفيش حاجة بترخص في مصر.

12. كلنا خسرانين لما سعر الدولار يزيد .. كل جنيه الدولار بيزيده سعر الحاجة بتزيد علي الاقل ١٠٪‏.

13. حجة أي تاجر تقابله في السوق تكلمه عن الأسعار يقولك بسبب سعر الدولار، بداية من سعر الفاكهة والخضار لحد بتاع الفراخ واللحمة.

14. محدش عارف ولا المسئولين حتى بيوضحوا الاقتصاد رايح على فين، في واشنطن – أمريكا وصلت الشفافية عندهم إنهم عاملين شاشة بتتجدد كل ثانية بمبلغ الضرائب اللي بيدفعه الأمريكيين للحكومة من سكان واشنطن بس وزي ما الصورة موضحة ٣ مليار و٤٠٠ مليون دولار بس ضرايب في واشنطن في أقل من شهرين، وكل مدينة أو ولاية في أمريكا ليها الشاشة الخاصة بيها”.

15. نفسي مسئول اقتصاد في البلد يطلع علينا ويصارحنا ويقولنا الاقتصاد والدولار رايحين على فين ويفهمنا ويفهم اللي عاوز يستثمر، مصر رايحة على فين؟.

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

5 − 5 =

DMCA.com Protection Status